Eze 16 | NdeIBE | STEP | Ilizwi likaJehova lafika kimi lisithi:

Ezekiel 16

Umfanekiso WeJerusalema Elingathembekanga

1 Ilizwi likaJehova lafika kimi lisithi:

2 “Ndodana yomuntu, melana leJerusalema ngezenzo zalo ezinengayo 3 uthi, ‘Nanku okutshiwo nguJehova Wobukhosi kulo iJerusalema: Umdabuko wenu kanye lozalo ngokwaselizweni lamaKhenani; uyihlo wayengumAmori unyoko engumHithi.

4 Ngosuku owazalwa ngalo ufokothi lwakho kaluqunywanga, njalo kawugeziswanga ngamanzi ukuba uhlambuluke, kumbe uhlikihlwe ngetshwayi loba ugoqelwe ngamalembu. 5 Kakho owaba lozwelo kuwe loba owaba lesihawu ukuba akwenzele okunye kwalezizinto. Kodwa waphoselwa etshatshalazini leganga, ngoba ngosuku owazalwa ngalo weyiswa.

6 “ ‘Kwathi lapho ngidlula eduze ngakubona uqhatshaqhatsha phakathi kwegazi lakho, njalo kwathi ulele phakathi khonapho kwegazi lakho ngathi kuwe, “Phila!” 7 Ngakukhulisa njengesihlahla seganga. Wakhula waqina waba yilitshe eliligugu elihle kakhulu kulawo wonke. Waphuhla njalo lezinwele zakho zakhula, wena owawunqunu uze.

8 “ ‘Muva ngadlula eduze futhi, kwathi lapho sengikukhangele ngabona ukuthi wawusukhulile okwanela uthando, ngelulela ingosi yesambatho sami ngaphezu kwakho ngavala ubunqunu bakho. Ngakufungela ngesifungo sami esiqinisekileyo, ngenza isivumelwano lawe, kutsho uJehova Wobukhosi, njalo waba ngowami.

9 “ ‘Ngakugezisa ngamanzi, ngagezisa legazi kuwe ngasengikugcoba ngamafutha. 10 Ngakugqokisa isigqoko esicecisiweyo ngakufaka amanyathelo esikhumba. Ngakugqokisa ilineni elihle ngakwembesa izambatho ezidulayo.

11 Ngakuhlobisa ngamatshe aligugu: Ngafaka amasongo ezingalweni zakho kanye lomgaxo entanyeni yakho, 12 ngasengifaka leringi empumulweni yakho, lamacici ezindlebeni zakho kanye lomqhele omuhle ekhanda lakho.

13 Waceciswa kanjalo ngegolide langesiliva; izigqoko zakho zazenziwe ngelineni elihle langamalembu adulayo kanye lamalembu acecisiweyo. Waba muhle kakhulu waze wakhuphuka waba yindlovukazi. 14 Udumo lwakho lwagcwala phakathi kwezizwe ngenxa yobuhle bakho, ngoba ubucwazicwazi engangikuphe bona benza ubuhle bakho baphelela, kutsho uJehova Wobukhosi.

15 “ ‘Kodwa wena wathemba ubuhle bakho wasebenzisa lodumo lwakho ekubeni liwule. Wachithela umusa wakho emuntwini wonke odlulayo kwathi ubuhle bakho baba ngobakhe.

16 Wathatha ezinye zezambatho zakho wenza ubucwebecwebe bezindawo eziphakemeyo, lapho owaqhubekela khona ngobuwule bakho. Izinto ezinje akumelanga zenzakale, loba zike zivele zenzeke. 17 Njalo wathatha leziceciso ezinhle zamatshe aligugu engakupha zona, iziceciso ezenziwa ngegolide lami lesiliva, wazenzela izithombe ezinduna wawula lazo.

18 Wathatha lezigqoko zakho ezicecisiweyo ukuba wembese izithombe, wanikela amafutha ami lempepha phambi kwazo. 19 Lokudla engakupha khona – ifulawa ecolekileyo, amafutha e-oliva kanye loluju engakupha khona ukuba udle – wakunikela phambi kwazo njengempepha elephunga elimnandi. Lokhu yikho okwenzakalayo, kutsho uJehova Wobukhosi.

20 “ ‘Wathatha futhi amadodana akho kanye lamadodakazi owangizalela wona wawanikela njengokudla ezithombeni. Ubuwule bakho babunganelanga na? 21 Wabulala abantwabami wabanikela ezithombeni. 22 Phakathi kwazo zonke izenzo zakho ezinengayo kanye lobuwule bakho kawuzikhumbulanga izinsuku zasebutsheni bakho, lapho wawunqunu njalo uze, uqhatshaqhatsha phakathi kwegazi lakho.

23 “ ‘Maye! Maye kuwe, kutsho uJehova Wobukhosi. Phezu kobubi bakho bonke,

24 wazakhela indunduma wenza lezindawo zokukhonzela ezidephileyo ezinkundleni zonke.

25 Ekuqaliseni kwemigwaqo yonke wakha izindawo zakho zokukhonzela ezidephileyo wonakalisa ubuhle bakho, wanikela umzimba wakho ngokuxabanisa okukhulu kuloba ngubani odlulayo. 26 Wenza ubuwule lamaGibhithe, omakhelwane bakho abalesigweba, wangithukuthelisa ngokuba ngubuyazonke kwakho okukhulu. 27 Ngakho ngelula isandla sami ukuba ngimelane lawe nganciphisa ilizwe lakho; ngakunikela ekuphangeni kwezitha zakho, amadodakazi amaFilisti, ethuswa yikuziphatha kwakho kobuxhwali! 28 Wenza ubuwule lama-Asiriya futhi, ngoba wawungasuthiseki; njalo langasemva kwalokho wawulokhu ungakholwanga.

29 Ngakho wandisa ukuxubanisa kwakho ukuba kungenise leBhabhiloni, ilizwe labathengisi, kodwa langalokhu kawusuthisekanga.

30 “ ‘Yeka ubuthakathaka bakho enhliziyweni, kutsho uJehova Wobukhosi, lapho usenza zonke lezizinto, usenza njengewule elingelanhloni! 31 Lapho usakha amadundulu akho ekuqaliseni kwemigwaqo yonke usenza lezindawo zakho zokukhonzela ezidephileyo ezinkundleni zonke, wawunganjengewule, ngoba wawuyala imbadalo.

32 “ ‘Wena mfazi oyisifebe! Uthanda izihambi kulomkakho. 33 Amawule wonke amukela imbadalo, kodwa wena zonke izithandwa zakho uzinika izipho, uzithenga ukuba zize kuwe zivela ezindaweni zonke zilanda ubuwule bakho. 34 Ngakho ebuwuleni bakho wehlukile kwabanye, kakho okudingayo ukuba awule lawe. Wena wahlukile, ngoba upha imbadalo ikanti kayikho wena oyiphiwayo.

35 “ ‘Ngakho-ke, wena wule, zwana ilizwi likaJehova! 36 Nanku okutshiwo nguJehova Wobukhosi: Njengoba wachitha inotho yakho waveza lobunqunu bakho ebuwuleni bakho lezithandwa zakho, njalo ngenxa yazo zonke izithombe zakho ezinengayo, langenxa yokuthi wazipha igazi labantwana bakho, 37 ngakho-ke ngizaziqoqa zonke izithandwa zakho owawuthokoza lazo, lezo owawuzithanda kanye lalezo owawuzizonda. Ngizaziqoqa ukuba zimelane lawe zivela ezindaweni zonke ngikunqunule phambi kwazo, njalo zizabubona bonke ubunqunu bakho. 38 Ngizakunika isigwebo sokujeziswa kwabesifazana abafebayo njalo abachitha igazi; ngizakwehlisela phezu kwakho impindiselo yegazi yolaka lwami kanye lentukuthelo yobukhwele. 39 Emva kwalokho ngizakunikela kuzithandwa zakho, zizabhidliza amadundulu akho zidilize lezindawo zakho zokukhonzela ezidephileyo. Zizakuhlubula izigqoko zakho zithathe lemiceciso yakho yamatshe aligugu zikutshiye unqunu njalo uze.

40 Zizaletha ixuku elimelane lawe, elizakutshaya ngamatshe, likuqumaqume ube yiziqa ngezinkemba zalo. 41 Bazatshisa izindlu zakho zilobe, bakujezise phambi kwabesifazana abanengi. Ngizabuqeda ubuwule bakho, njalo kawusayikuzibhadala futhi izithandwa zakho.

42 Lapho-ke ulaka lwami kuwe luzadeda lokuthukuthela kwami kobukhwele kuzasuka kuwe; ngizaphola ngingabe ngisathukuthela futhi.

43 “ ‘Ngenxa yokuthi izinsuku zobutsha bakho kawuzikhumbulanga kodwa wangithukuthelisa ngezinto zonke lezi, ngeqiniso lokhu okwenzileyo ngizakwehlisela phezu kwekhanda lakho, kutsho uJehova Wobukhosi. Kanje kawenzanga isigwebo kuzo zonke lezizenzo zakho ezinengayo na?

44 “ ‘Bonke abatsho izaga bazasitsho isaga lesi ngawe esithi: “Indodakazi ifuna unina.”

45 Wena uyindodakazi kanyoko sibili, owayeseyisa umkakhe kanye labantwana bakhe; njalo ungudade sibili wabodadewenu, abeyisa omkabo labantwana babo. Unyoko wayengumHithi uyihlo engumAmori. 46 Udadewenu omdala wayenguSamariya, owayehlala ngasenyakatho kwakho labantwana bakhe; njalo udadewenu omncane owayehlala ngaseningizimu kwakho lamadodakazi akhe nguSodoma.

47 Kawuhambanga ezindleleni zabo nje kuphela njalo walingisa lezenzo zabo ezinengayo, kodwa kuzo zonke izindlela zakho wena waphanga waxhwala kakhulu kulabo. 48 Ngeqiniso elinjengoba ngikhona, kutsho uJehova Wobukhosi, udadewenu uSodoma lamadodakazi akhe kazange akwenze okwenziwa nguwe lamadodakazi akho.

49 “ ‘Isono sikadadewenu uSodoma sasiyilesi: Yena lamadodakazi akhe babezigqaja, badla bedlulisa njalo bengakhathali; kababasizanga abayanga labaswelayo. 50 Babezazisa njalo besenza izinto eziyangisayo phambi kwami. Ngakho ngabasusa njengoba ubonile. 51 USamariya kenzanga ingxenye yezono wena osuzenzile. Wenze izinto ezinengisayo kulabo wenza odadewenu bangathi balungile ngenxa yezinto zonke lezi ozenzileyo. 52 Lithwale ihlazo lakho, ngoba usunike isizatho esilungileyo ngabodadewenu. Ngoba izono zakho zazizimbi kakhulu kulezabo, bakhanya belunge kakhulu kulawe. Ngakho, woba lenhloni uthwale ihlazo lakho, ngoba wenze odadewenu bakhanya belungile.

53 “ ‘Kodwa-ke, ngizayibuyisela inhlanhla yeSodoma lamadodakazi ayo kanye leyeSamariya lamadodakazi ayo, lenhlanhla yakho kanye labo, 54 ukuze uthwale ihlazo lakho njalo ube lenhloni ngokubaduduza. 55 Njalo odadewenu, iSodoma lamadodakazi alo kanye leSamariya lamadodakazi alo, bazabuyela kulokho ababeyikho kuqala. 56 Udadewenu, uSodoma wawungeke umutsho ngezinsuku zokuzigqaja kwakho, 57 ububi bakho bungakavezwa. Lanxa kunjalo, khathesi usuhlekwa ngamadodakazi ase-Edomi labo bonke omakhelwana bayo kanye lamadodakazi amaFilisti – bonke labo abakuhanqileyo abakweyisayo. 58 Uzathwala umvuzo wesigweba sakho kanye lezenzo zakho ezinengayo.

59 “ ‘Nanku okutshiwo nguJehova Wobukhosi: Ngizakuphatha njengalokhu okukufaneleyo, ngoba udelele isifungo sami ngokwephula isivumelwano. 60 Kodwa ngizasikhumbula isivumelwano engasenza lawe ezinsukwini zobutsha bakho, njalo ngizakwenza isivumelwano esingapheliyo lawe. 61 Lapho-ke uzazikhumbula izindlela zakho ube lenhloni lapho ususamukela odadewenu, labo abadala kulawe kanye lalabo abancane. Ngizakunika bona njengamadodakazi, kodwa hatshi ngenxa yesivumelwano sami lawe. 62 Ngakho ngizamisa isivumelwano sami lawe njalo uzakwazi ukuthi mina nginguJehova. 63 Ngakho, lapho sengikwenzela inhlawulelo yakho konke okwenzileyo, uzakhumbula ube lenhloni ungawuvuli futhi umlomo wakho ngenxa yokuthotshiswa kwakho, kutsho uJehova Wobukhosi.’ ”